Ўзбекистонда донорлик қони танқислиги сақланиб қолмоқда — ССВ

 

Ўзбекистонда 2025 йил давомида тиббий эҳтиёжлар учун 153 тонна донорлик қони тайёрланди. Бу кўрсаткич аввалги йилларга нисбатан ўсишни кўрсатмоқда, бироқ мамлакатнинг тўлиқ эҳтиёжларини қондириш учун донорлик ҳаракатини янада ривожлантириш зарур.

 

Соғлиқни сақлаш вазирлиги матбуот хизмати маълумотларига кўра, 2024 йилда 148 тонна, 2023 йилда эса 130,6 тонна донорлик қони тайёрланган. Шу тариқа, 2025 йилги кўрсаткич сўнгги уч йил ичидаги энг юқори натижа бўлди.

 

Республика қон қуйиш маркази директори Алонур Саидовнинг таъкидлашича, ҳозирда мамлакатда ҳар 1000 аҳолига 10 нафар донор тўғри келмоқда. Бу эса Жаҳон соғлиқни сақлаш ташкилоти тавсия этган ҳар 1000 кишига 30 донор стандартидан қарийб уч баравар паст.

 

Мутахассислар ушбу кўрсаткичга эришиш онкологик ва гематологик касалликларни даволаш, мураккаб жарроҳлик амалиётлари ўтказиш ҳамда йўл-транспорт ҳодисалари ва фавқулодда ҳолатларда жабрланганларга тезкор ёрдам кўрсатиш учун зарур қон компонентлари билан тиббиёт муассасаларини тўлиқ таъминлаш имконини беришини қайд этмоқда.

 

Ихтиёрий қон топширишни рағбатлантириш мақсадида мамлакатда қон хизматлари моддий-техник базаси кенгайтирилмоқда, ҳудудларда махсус жиҳозланган мобил қон топшириш бўлинмалари фаолияти йўлга қўйилди. Шунингдек, қонунчиликка мувофиқ, фахрий донорлар учун бир марталик тўловлар миқдори оширилди, уларга имтиёзли таътил, бепул жамоат транспортидан фойдаланиш ҳамда санаторий йўлланмаларини олиш ҳуқуқлари берилди.