Ўзбекистонда никоҳ шартномалари энди видеоконференция орқали ҳам расмийлаштирилади

 

Ўзбекистонда никоҳ шартномаларини нотариал тасдиқлаш тартиби белгиланди. Адлия вазирлиги томонидан “Никоҳ шартномаларини нотариал тасдиқлаш тартиби тўғрисида”ги низом давлат рўйхатидан ўтказилди.

 

Низомга мувофиқ, никоҳ шартномалари нотариуслар томонидан бевосита нотариал идора биносида, видеоконференция орқали ёки ариза берувчининг илтимосига кўра жойига чиққан ҳолда расмийлаштирилади.

 

Шартномани тузиш учун ариза берувчи шахс нотариал идорага шахсан мурожаат қилиши ёки Давлат хизматларининг ягона давлат реестри (ЙДХР) ҳамда E-notarius.uz ахборот портали орқали рўйхатдан ўтиши мумкин.

 

Шартномани тасдиқлаш жараёнида нотариус ариза берувчи(лар)нинг шахсини аниқлайди ва қуйидаги ҳолатларни текширади: томонларнинг никоҳ ёшига етганлиги, улар ўртасида никоҳ тузилган ёки тузилмаганлиги, томонлардан бирининг бошқа шахс билан амалдаги никоҳи мавжуд эмаслиги, шунингдек никоҳ шартномаси илгари тузилмаганлиги.

 

Тўловлар амалга оширилгач ва шартнома лойиҳаси тўлиқ расмийлаштирилгач, томонлар шартномани имзолаш учун бир вақтнинг ўзида нотариал идорага таклиф этилади. Шартноманинг барча нусхалари томонлар томонидан нотариус иштирокида, уларнинг фамилияси, исми ва отасининг исми тўлиқ кўрсатилган ҳолда шахсан имзоланади.