Учтепада мансабдор шахс пора билан қўлга олинди

 

 

Коррупция жамият тараққиётига жиддий таҳдид солувчи иллат сифатида адолат ва қонун устуворлигига путур етказиши таъкидланмоқда. Шу каби ҳолатларни бартараф этиш мақсадида Давлат хавфсизлик хизмати ҳамда Тошкент шаҳар Ички ишлар бош бошқармаси ҳамкорлигида навбатдаги тезкор тадбир ўтказилди. Бу ҳақда Zamon.uz га ДХХ хабар берди.

 

Тадбир давомида Учтепа тумани ҳокимлигининг Уй-жой коммунал хизмат кўрсатиш ва ободонлаштириш бўлими бош мутахассиси тадбиркордан ноқонуний равишда 3 минг АҚШ доллари олаётган пайтида ашёвий далиллар билан ушланди. Маълум бўлишича, у жорий йилда бузилиши лозим бўлган савдо объектлари рўйхати тузилаётганини баҳона қилиб, тадбиркорга тегишли дўконни ушбу рўйхатга киритмаслик эвазига пул талаб қилган.

 

Ҳокимият вакили ўзининг туман ҳокимлигида юқори лавозимда ишловчи яқин алоқалари борлигини рўкач қилиб, дўкон бузилмаслигини ваъда қилган. Аммо ушбу ноқонуний ҳаракат ўз вақтида фош этилди.

 

Ҳозирда мансабдор шахсга нисбатан Жиноят кодексининг 168-моддаси 3-қисми «в» банди ҳамда 28, 211-моддаси 1-қисми асосида жиноят иши қўзғатилди. Унга нисбатан «қамоқ» эҳтиёт чораси қўлланилган. Айни пайтда тергов ҳаракатлари давом этмоқда.