Хитой АҚШ Конгресси ходимларининг электрон почталарини бузиб кирди — Financial Times
Хакерлар Вакиллар палатасининг Хитой масалалари билан шуғулланувчи қўмитаси, шунингдек, ташқи сиёсат, разведка ва қуролли кучлар бўйича қўмиталар ёрдамчиларининг электрон почта тизимларига кириш имконига эга бўлган.
Financial Times нашрининг хабар беришича, Хитой разведкаси билан боғлиқ деб ҳисобланаётган “Salt Typhoon” кибержосуслик кампанияси доирасида АҚШ Конгрессининг бир қатор муҳим қўмиталари ходимларининг электрон почта тизимларига ноқонуний равишда кирилган. Ушбу ҳужумлар 2025 йил декабрь ойида аниқланган.
Манбаларга кўра, хакерлар Вакиллар палатасининг Хитой масалалари билан шуғулланувчи қўмитаси, шунингдек, ташқи сиёсат, разведка ва қуролли кучлар бўйича қўмиталар ёрдамчиларининг электрон почта тизимларига кириш имконига эга бўлган. Айрим ҳолатларда мансабдор шахсларнинг қўнғироқлари ва хабар алмашувлари ҳам кузатув остига олингани айтилмоқда.
АҚШ расмийлари тармоқларда муайян заифликлар мавжудлигини тан олган, бироқ дипломатик сабаблар туфайли ҳозирча Хитой Давлат хавфсизлик вазирлигига қарши санкциялар жорий этишни кечиктирган. Оқ уй ҳамда ҳужумга учраган қўмиталар бу масала юзасидан расмий изоҳ бермаган.
Хитой томони эса барча айбловларни қатъиян рад этмоқда. Пекин бу хабарларни асоссиз айбловлар деб атаган. Шу билан бирга, АҚШ расмийлари Конгресс аъзолари ва уларнинг ёрдамчилари, айниқса ҳарбий ва разведка тузилмаларини назорат қилувчилар, узоқ йиллардан буён кибержосусликнинг асосий нишони бўлиб келаётганини таъкидламоқда.
