Истанбулда кучли бўрон кузатилди: барча паром қатновлари бекор қилинди

 

Истанбулда кучли бўрон сабаб барча паром ва айрим канат йўллари қатнови тўхтатилди. Бу ҳақда Ҳаберлар нашри хабар берди.

 

Метеорология Бош бошқармасининг олдиндан берган огоҳлантиришларидан сўнг, Истанбулда кучли бўрон бошланди. Жануби-ғарбий йўналишдан эсаётган кучли шамол Мармара денгизи ва бўғоз ҳудудларида улкан тўлқинларни юзага келтирди.

 

Ноқулай об-ҳаво шароити сабабли денгиз транспорти фаолиятига жиддий таъсир кўрсатилди. Истанбул шаҳар ҳокимиятига қарашли “Şehir Hatları AŞ” компанияси расмий баёнотида барча паром рейслари иккинчи огоҳлантиришгача бекор қилинганини маълум қилди. Худди шундай қарор IDО компанияси томонидан ҳам қабул қилинган.

 

Шунингдек, Метро Истанбул маълумотига кўра, об-ҳаво шароити ёмонлашгани сабабли TF1 Maçka–Taşkışla ва TF2 Eyüp–Piyer Loti канат йўллари қатнови вақтинча тўхтатилди.

 

Бўрон оқибатида Зейтинбурну ва Бешиктош соҳилларида кучли тўлқинлар қирғоққа урилиб, айрим ҳудудларда хавфли вазиятлар юзага келди. Баъзи фуқаролар тўлқинлар хавфини эътиборга олмаган ҳолда қирғоқда бўлиб, сув остида қолиб кетган ҳолатлар кузатилди.

 

Бундан ташқари, Истанбулнинг Ҳаваалани туманидаги Taşoca кўчасида тўрт қаватли бинонинг том қисми бўрон таъсирида учиб кетди. Том бўлаклари икки дона тўхтаб турган автомобиль устига қулаб тушган.

 

Мазкур ҳодиса оқибатида транспорт воситаларига моддий зарар етказилган, жабрланганлар йўқ. Воқеа жойига тиббиёт, ўт ўчириш ва фавқулодда хизматлар жалб этилиб, ҳудуд хавфсизлиги таъминланди.