Нетаняху Ливанда янги ҳарбий операция ўтказиш учун АҚШ розилигини олди — КАN
Операция “Ҳизбуллоҳ” ҳарбий тузилмаларини қуролсизлантиришга қаратилган.
Исроил Ливан ҳудудида янги ҳарбий операция ўтказиш учун АҚШнинг розилигини олган. Бу ҳақда Исроилнинг КАН давлат телерадиокомпанияси хабар берди дейди ТАСС.
Манбаларга кўра, Исроил бош вазири Бенямин Нетаняху ҳукумат аъзоларига АҚШ президенти Доналд Трамп ушбу операцияни ўтказишга рухсат берганини маълум қилган. Режалаштирилаётган операциянинг асосий мақсади “Ҳизбуллоҳ”нинг ҳарбий тузилмаларини қуролсизлантиришдан иборат.
Қайд этилишича, Қўшма Штатларга “Ҳизбуллоҳ” қуролсизланмаган тақдирда, Исроил бу жараённи мустақил равишда амалга ошириш ниятида экани етказилган. Бу эса Исроилнинг шимолий ҳудудларида янги жанговар ҳаракатлар бошланиши ва бир неча кун давом этадиган тўқнашувларга олиб келиши мумкин.
Эслатиб ўтилишича, 2025 йил декабрь ойида Ливан бош вазири Наваф Салам мамлакат ҳукумати Литани дарёсининг шимолидаги ҳудудларда фаолият юритаётган қуролланган гуруҳларни қуролсизлантириш режасининг иккинчи босқичига ўтишга тайёр эканини билдирган эди.
Шунингдек, Салам Ливан армияси ўз вазифаларини тўлиқ адо этиши учун халқаро ҳамжамият томонидан ҳарбий ва молиявий ёрдам зарурлигини таъкидлаган.
