Янги йил байрамларида хитойлик сайёҳларнинг Ўзбекистонга ташрифи икки баравар ошди
Мутахассислар бу ўсишни Хитой фуқаролари учун визасиз режим жорий этилгани билан боғламоқда.
Янги йил байрамлари муносабати билан Хитойдан Ўзбекистонга келаётган сайёҳлар оқими сезиларли даражада ошди. Бу ҳақда Туризм қўмитаси Синхуа ахборот агентлигига таяниб маълум қилди.
Қайд этилишича, 1–3 январ кунлари Хитойдан Ўзбекистонга авиачипта бронь қилишлар сони ўтган йилнинг шу даврига нисбатан икки баравар кўпайган.
Мутахассислар ушбу ўсишни 2025 йилдан бошлаб Хитой фуқаролари учун визасиз режим жорий этилгани билан изоҳламоқда. Мазкур тартиб саёҳат жараёнини соддалаштириб, қисқа муддатли туризм учун мавжуд тўсиқларни сезиларли даражада камайтирди.
Шунингдек, Хитойда яқинда якунланган “Ўзбекистон – туризм йили” доирасида мамлакатнинг сайёҳлик салоҳияти фаол тарғиб қилингани ҳамда икки давлатнинг йирик шаҳарлари ўртасида тўғридан-тўғри авиарейслар сонининг кенгайтирилгани қизиқиш ошишига хизмат қилгани таъкидланмоқда.
Маълумотларга кўра, хитойлик сайёҳлар асосан Самарқанд, Бухоро ва Хива шаҳарларини қамраб олган тарихий йўналишларга устуворлик бермоқда.
