“Агар Путин ёки отам буюрса” — Қодировнинг ўғли Зеленскийни тутиб келишини айтди
Чеченистон Хавфсизлик кенгаши котиби Зеленскийни ҳарбий жиноятчи деб атади.
Чеченистон Республикаси Хавфсизлик кенгаши котиби Адам Қодиров Украина президенти Владимир Зеленскийга нисбатан кескин баёнот берди. У ижтимоий тармоқдаги саҳифасида Зеленскийни ҳарбий жиноятчи сифатида Грознийга олиб келиш мумкинлигини айтиб ўтди. Бу ҳақда news.ru нашри хабар берди.
Адам Қодировнинг таъкидлашича, агар Россия президенти Владимир Путин ёки Чеченистон раҳбари Рамзан Қодиров томонидан тегишли топшириқ берилса, Зеленскийни “исталган жойда топиш ва Грознийга олиб келиш” масаласи фақат вақт билан боғлиқ бўлади. Унинг сўзларига кўра, бундай ҳолатда Зеленский президент сифатида эмас, балки «жиноятчи» сифатида олиб келинади.
Шунингдек, Адам Қодиров Зеленскийга нисбатан бир қатор ҳақоратли ибораларни ишлатиб, Украина раҳбарининг сиёсий фаолияти якунига яқинлашаётганини иддао қилди.
Аввалроқ Чеченистон раҳбари Рамзан Қодиров Зеленскийнинг гўёки уни «ўғирлаш» ҳақидаги чақириғини танқид қилган ва бу каби баёнотлар можарони тинч йўл билан ҳал этишга тўсқинлик қилишини билдирган эди. Унинг сўзларига кўра, бундай чиқишлар Украина раҳбарининг ўзи учун сиёсий ва ахлоқий жиҳатдан салбий оқибатларга олиб келади.
Адам Қодиров эса бу баёнотларни жавобсиз қолдирмаслигини, Чеченистонда бундай сўзлар “унутилмаслиги ва кечирилмаслиги”ни таъкидлади.
