Австралияда фавқулодда ҳолат: Ўрмон ёнғинлари авж олмоқда

 

Австралиянинг жануби-шарқидаги Виктория штатида учта йирик ўрмон ёнғини сабаб фавқулодда ҳолат эълон қилинди. Бош вазир Жасинта Аллан 18 та муниципалитет ва чанғи курортларини қамраб олган ҳужжатни имзолади. Бу ҳақда Redaktor.az хабар бермоқда.

 

Фавқулодда ҳолат ҳукуматга аҳолини мажбуран эвакуация қилиш, ҳудуд ичидаги ҳаракатни чеклаш ва хусусий мулкдан ёнғинларни ўчириш учун фойдаланиш ҳуқуқини беради.

 

Ёнғинлар тез тарқалаётгани боис, ҳукумат аҳолини ҳимоя қилишни биринчи ўринга қўйди. Ҳозирда уч киши бедарак йўқолган. ОАВ маълумотларига кўра, ҳафтанинг ўртасида юзага келган ёнғинлар 300 минг гектардан ортиқ майдонни қамраб олган ва ҳозир ҳам штатда 10 та йирик ёнғин давом этмоқда.

 

Австралиянинг бошқа ҳудудларида эса об-ҳаво шароити тескари: Янги Жанубий Уэлс ва Сиднейда энг иссиқ кунлар кузатилмоқда, Квинсленд ҳудудида эса тропик циклон хавфи сабабли сув тошқини ҳақида огоҳлантириш берилган. Виктория штати дунёдаги ёнғинлар энг кўп учрайдиган ҳудудлардан бири бўлиб, ҳозирги офат 2009 йилдаги “Қора шанба” фожиаси билан таққосланмоқда.

 

Олимлар таъкидлаганидек, бу мавсумдаги тутун аллақачон Аргентина қирғоқларигача етган ва экологик офатнинг глобал миқёсини кўрсатмоқда. Ҳозирги ёнғинлар 2019-20 йиллардаги “Қора ёз”дан бери штатдаги энг катта офат бўлиб, ўшанда Туркия катталигидаги ҳудуд вайрон бўлган ва 33 киши ҳалок бўлган эди.