Эронда намойишларга алоқадор шахслар қатл қилиниши мумкин
Жиноят қонунчилигига кўра, қурол ишлатган тартибсизлик иштирокчилари “давлатга қарши исён” айби билан энг оғир жазога тортилиши мумкин.
Теҳрон прокурори Али Солиҳи Эронда юз берган тартибсизликларга алоқадор шахсларга нисбатан қатъий чоралар кўрилишини маълум қилди. Унинг айтишича, тартибсизликларда иштирок этган, давлат ва хусусий мулкка зарар етказган, шунингдек, ҳуқуқни муҳофаза қилиш органлари ходимларига қарата ўқ узган шахслар “давлатга қарши исён кўтариш” айби билан жавобгарликка тортилиши мумкин. Бу ҳақда news.mail нашри хабар берди.
Али Солиҳи Эрон давлат телеканалига берган баёнотида суд тизимининг асосий устувор вазифаси фуқаролар хавфсизлигини таъминлаш эканини таъкидлади. “Террористик ҳаракатларга нисбатан ёндашувимиз қатъий ва тўхтатувчи бўлади. Бундай ҳаракатлар давлатга қарши исён сифатида баҳоланади ва қонун доирасида жазоланади”, — деди у.
Эрон жиноят қонунчилигига кўра, давлатга қарши исён аҳолини қўрқитиш мақсадида қурол ишлатиш сифатида талқин этилади. Ушбу жиноятда айбдор деб топилган шахсларга нисбатан ўлим жазоси қўлланиши мумкин.
Маълумотларга кўра, 8 январь куни Теҳронда ҳукуматга қарши оммавий норозилик намойишлари бўлиб ўтган. Тартибсизликлар Караж шаҳрини ҳам қамраб олган. Намойишчилар йўлларни тўсиб, айрим полиция бўлимларига ўт қўйган. Тўқнашувлар оқибатида 45 киши, жумладан, тўрт нафар вояга етмаган бола ва икки нафар ҳуқуқни муҳофаза қилиш органи ходими ҳалок бўлган.
