Озарбайжон халқаро қидирувдаги Эрон фуқаросини Ўзбекистонга экстрадиция қилди
Экстрадиция 2002 йилги халқаро конвенцияга мувофиқ амалга оширилди.
Озарбайжон фирибгарлик жиноятида айбланиб, халқаро қидирувда бўлган Эрон фуқаросини Ўзбекистонга экстрадиция қилди. Бу ҳақда Озарбайжон Бош прокуратураси маълум қилди дейди Аzertag нашри.
Маълум қилинишича, 1970 йилда туғилган Эрон фуқароси Имани Али Абдуллоҳ Ўзбекистон Бош прокуратураси сўрови асосида Озарбайжонга нисбатан экстрадиция қилинган. У фирибгарлик жиноятини содир этишда айбланиб, халқаро қидирувга берилган эди.
Айбланувчи 2025 йилда Озарбайжон ҳудудида аниқланиб, ҳибсга олинган. 2002 йил 7 октябрда қабул қилинган “Фуқаролик, оилавий ва жиноий ишлар бўйича ҳуқуқий ёрдам ва ҳуқуқий муносабатлар тўғрисида”ги конвенцияга мувофиқ, уни экстрадиция қилиш ҳақида қарор қабул қилинди.
Имани Али Абдуллоҳ Озарбайжон Адлия вазирлиги Жазони ижро этиш хизмати махсус карвони ҳамроҳлигида Ўзбекистоннинг ваколатли органларига топширилди.
Озарбайжон Бош прокуратураси Ўзбекистон ҳуқуқни муҳофаза қилувчи органлари билан жиноятчиликка қарши кураш доирасидаги ҳамкорлик изчил ва самарали давом этаётганини таъкидлади.
