Қирғизистон президенти 1 йилда қанча даромад олган?
Солиқ идоралари 2024 йил учун Садир Жапаровнинг даромади ва мол-мулки бўйича маълумотларни эълон қилди.
Қирғизистонда давлат солиқ идоралари 2024 йил учун давлат ва муниципал хизматчиларнинг даромадлари бўйича консолидацияланган солиқ декларацияларини эълон қилди. Ушбу маълумотлар асосида Қирғизистон президенти Садир Жапаровнинг даромади ҳам ошкор бўлди. Бу ҳақда NUR.KZ нашри хабар берди.
Давлат солиқ хизмати маълумотларига кўра, Садир Жапаровнинг 2024 йилдаги расмий даромади 2 214 482,38 сомни ташкил этган. Харажатлар бўйича аниқ маълумотлар очиқланмаган.
Декларацияда президентга тегишли мол-мулк ҳам кўрсатилган. Хусусан, у 2600 квадрат метрли бизнес маркази, Иссиқкўл вилоятининг Тюп туманида жойлашган 63 сотих қишлоқ хўжалиги ери ҳамда 21 сотих ер участкасига эгалик қилади. Шунингдек, унинг шахсий мулки сифатида қиймати 100 минг сом бўлган «Жигули» русумли автомобиль қайд этилган.
Бундан ташқари, декларацияда 1,1 миллиард сомдан ортиқ маблағ алоҳида молиявий тушум сифатида кўрсатилган. Президентнинг яқин қариндошларига тегишли умумий даромад эса 29,7 миллион сомни ташкил этган.
