Қорақалпоғистонда 1 килограммдан ортиқ “опий” мусодара қилинди

 

Давлат хавфсизлик хизмати Қорақалпоғистон Республикаси бўйича бошқармаси ҳамда Ички ишлар вазирлиги тезкор ходимлари ҳамкорлигида гиёҳвандлик воситаларининг ноқонуний айланмасига қарши қаратилган тезкор тадбир ўтказилди.

 

Тадбир давомида Нукус шаҳрида 1972 йилда туғилган, муқаддам судланган маҳаллий фуқаро 9 грамм «опий» гиёҳвандлик воситасини Шуманай туманида яшовчи, 1965 йилда туғилган фуқарога 4 миллион сўм эвазига сотаётган вақтда ушланди. Бу ҳақда ДХХ Zamon.uzga хабар берди.

 

Текширув жараёнида мазкур шахснинг ёнидан қўшимча равишда яна 5 грамм «опий» моддаси ҳам ашёвий далил сифатида олинди.

 

Терговга қадар текширув давомида аниқланишича, ушланган шахс ушбу гиёҳвандлик воситасини 1981 йилда туғилган, муқаддам гиёҳвандлик воситалари савдоси билан боғлиқ жинояти учун судланган танишидан олган.

 

Хўжайли туманида давом эттирилган тезкор тадбирлар чоғида мазкур шахс 20 грамм «опий»ни 8 миллион сўм эвазига сотаётган пайтида қўлга олинди. Шунингдек, унинг ёнида бўлган сумкадан 1 килограмм 176 грамм «опий» гиёҳвандлик воситаси аниқланиб, олиб қўйилди.

 

Маълум бўлишича, мусодара қилинган гиёҳвандлик воситалари Тожикистон Республикасидан контрабанда йўли билан олиб кирилган.

 

Ҳозирда ушбу ҳолат юзасидан уч нафар шахсга нисбатан Ўзбекистон Республикаси Жиноят кодексининг 28-моддаси, 246-моддаси 2-қисми ҳамда 273-моддаси 5-қисми билан жиноят иши қўзғатилиб, уларга нисбатан «қамоқ» эҳтиёт чораси қўлланилган.

 

Таъкидланишича, амалдаги қонунчиликка мувофиқ, бундай жиноятни содир этган шахслар 10 йилдан 20 йилгача озодликдан маҳрум этилиши мумкин.