Трамп: АҚШ Гренландия масаласида “хоҳласа ҳам, хоҳламаса ҳам” ҳаракат қилади

 

АҚШ президенти Дональд Трамп Гренландия масаласида кескин баёнот бериб, Қўшма Штатлар бу ҳудуд бўйича “хоҳласа ҳам, хоҳламаса ҳам” ҳаракат қилишини айтди. Унинг сўзларига кўра, агар АҚШ фаол қадам ташламаса, Гренландия Россия ёки Хитой таъсирига тушиб қолиши мумкин. Бу ҳақда Euronews хабар бермоқда.

 

Трамп бу фикрларни Оқ уйда бўлиб ўтган учрашувда, вице-президент Ж.Д. Вансе, давлат котиби Марко Рубио ва энергетика соҳаси вакиллари иштирокида билдирди. Президент Данияни “ёқтириши”ни айтиб, масалани келишув орқали ҳал қилишни афзал кўришини, аммо зарурат туғилса, “қийин йўл”дан ҳам қайтмаслигини таъкидлади.

 

Гренландия стратегик жойлашуви ва бой табиий ресурслари билан ажралиб туради. У НАТО аъзоси бўлган Даниянинг ярим автоном ҳудуди ҳисобланади. Трамп Гренландияга қизиқишини доимий равишда АҚШнинг миллий хавфсизлик манфаатлари билан изоҳлаб келмоқда.

 

Бироқ Дания томони бу баёнотларни кескин рад этди. Бош вазир Мэтте Фредериксен АҚШнинг Дания Қироллиги таркибидаги бирор ҳудудни аннексия қилишга ҳаққи йўқлигини айтди. Унинг фикрича, бундай ҳаракат НАТО иттифоқи ва Иккинчи жаҳон урушидан кейинги хавфсизлик тизимига жиддий путур етказиши мумкин. Дания ва Гренландия вакиллари яқин кунларда Вашингтонда музокараларни давом эттириши кутилмоқда.