Хорижда вафот этган ўзбекистонликларни ватанга қайтариш баҳонасида пул йиғаётганлардан огоҳлантириш берилди
Миграция агентлиги фуқароларни ижтимоий тармоқларда тарқатилаётган сохта хайрия эълонларига ишонмасликка ва ҳеч қандай ҳолатда пул ўтказмасликка чақирди.
Ижтимоий тармоқларда хорижда бўлиб турган вақтида вафот этган ўзбекистонликларнинг жасадларини ватанга олиб келиш учун турли пластик карта рақамларига пул йиғиш ҳолатлари кўпаймоқда. Бу ҳақда Ўзбекистон Республикаси Вазирлар Маҳкамаси ҳузуридаги Миграция агентлиги маълум қилди.
Агентликнинг билдиришича, айрим шахслар эски ёки нотўғри маълумотлар асосида одамларнинг ҳис-туйғуларидан фойдаланиб, фирибгарлик билан шуғулланмоқда. Бундай ҳолатлар жамиятда ишончсизлик ва чалғитишга олиб келаётгани таъкидланган.
Миграция агентлиги фуқароларни ижтимоий тармоқларда тарқатилаётган бундай чақириқларга ишонмасликка ва ҳеч қандай ҳолатда пул ўтказмасликка чақирди. Қонуний ва ишончли йўл сифатида фақат расмий давлат органларига мурожаат қилиш тавсия этилди.
Шунингдек, агентлик эслатишича, агар Ўзбекистон фуқароси хорижда вафот этса, унинг жасадини ватанга олиб келиш Миграция жамғармаси маблағлари ҳисобидан амалга оширилади. Бунинг учун марҳумнинг яқинлари ёки вакиллари Миграция агентлигига бевосита мурожаат қилиши лозим.
