Мўйноқда табиий газ топилди
2026-йил 10 январ ҳолатига кўра, қудуқ 5265 метр чуқурликкача етказилган.
Устюрт минтақасидаги «Мўйноқ» кони атрофида жойлашган Шагирлик — қуйи юра ҳудудида бурғилланган 2-сонли излов қудуғида юқори босим остида табиий газ оқими қайд этилди. Мутахассислар аниқланган газ уйумлари саноат миқёсида эканини маълум қилди. Бу ҳақда Uzbekneftgaz хабар бермоқда.
Мазкур қудуқ Тоғ-кон саноати ва геология вазирлиги тизимидаги «Ўзбекгеофизика» АЖ ҳамда «Нефт ва газ конлари геологияси ва қидируви институти» томонидан олиб борилган 3D сейсмик тадқиқотлар натижаларига таянган ҳолда чуқур излов бурғилаш учун тайёрланган. Ишлар замонавий геологик маълумотлар асосида амалга оширилган.
Қудуқни бурғилаш жараёни Жамият ҳамда унинг таркибидаги Лойиҳа бошқарув офиси мутахассислари томонидан олиб борилди. Ушбу жамоа хорижда нефть-газ соҳасида тажриба орттирган, давлат раҳбари топшириғига биноан мамлакатга жалб этилган юқори малакали муҳандис ва геологлардан иборат.
Маълум қилинишича, 2026-йил 10-январ ҳолатига кўра, қудуқ 5265 метр чуқурликкача етказилган ва 5061–5265 метр оралиғида қуйи юра қатламларидан газ уйумлари аниқланган. Эндиликда ушбу қатламларнинг геологик тузилишини чуқурроқ ўрганиш ҳамда газ захиралари чегарасини белгилаш мақсадида майдонда 3 ва 4-сонли янги излов-қидирув қудуқларини бурғилаш режалаштирилмоқда.
