Қоракўлда 20 нафар абитуриент заҳарлангани ҳақидаги хабарга ССБ муносабат билдирди
Беморлар белгиланган тиббий стандартлар асосида УТТ, рентген ва лаборатор текширувлардан ўтказилган.
Бухоро вилояти Қоракўл туманида жойлашган ўқув марказларидан бирида абитуриентлар заҳарлангани ҳақидаги хабарларга вилоят Соғлиқни сақлаш бошқармаси муносабат билдирди. Аввалроқ ижтимоий тармоқларда ва ОАВда 11 январь куни тонгда 20 нафар абитуриент заҳарланиш аломатлари билан шифохонага олиб келингани ҳақида хабарлар тарқалган эди.
Расмий маълумотга кўра, Қоракўл тумани Ҳожалар МФЙ, Улуғбек кўчасида жойлашган “Илм нури” МЧЖга қарашли ўқув марказида таҳсил олаётган 20 нафар абитуриентда номаълум модда таъсиридан заҳарланиш ҳолати аниқланган. Хабар келиб тушиши билан улар зудлик билан туман тиббиёт бирлашмасига етказилган.
Ҳолат юзасидан вилоят Соғлиқни сақлаш бошқармаси бошлиғи Элёр Олтиев бошчилигида ишчи гуруҳ тузилиб, воқеа жойида зарур чоралар кўрилган. Беморлар белгиланган тиббий стандартлар асосида УТТ, рентген ва лаборатор текширувлардан ўтказилган. Шунингдек, вилоятдан 10 нафар токсиколог ва реаниматолог жалб этилиб, Республика шошилинч тиббий ёрдам илмий маркази мутахассислари билан онлайн консилиум ўтказилган.
Кўрилган тиббий чоралар натижасида барча 20 нафар абитуриентнинг аҳволи яхшиланган ва улар амбулатор даволаниш учун уйига жавоб берилган. Ҳар бир беморга оилавий шифокор ва патронаж ҳамшираси бириктирилган. Ҳозирда уларнинг аҳволи қониқарли, шикоятлар йўқ. Қон намуналарининг экспертиза натижалари бўйича қўшимча маълумот берилиши маълум қилинди.
