Эрондаги намойишларда ҳалок бўлганлар сони 12 минг нафарга етди — ОАВ
Қурбонларнинг аксарияти 30 ёшгача бўлган ёшлар экани айтилмоқда.
Эронда давом этаётган оммавий норозилик намойишларини бостириш жараёнида ҳалок бўлганлар сони кескин ошгани ҳақида хабарлар тарқалмоқда. Iran International нашрининг суриштирувига кўра, сўнгги кунларда юз берган воқеалар оқибатида камида 12 минг киши ҳаётдан кўз юмган.
Хабарда айтилишича, ҳукумат намойишларни куч билан бостириш билан бирга, ахборот тарқалишини чеклашга ҳам уринмоқда. Мамлакатда интернет алоқаси жиддий даражада чекланган, мустақил ОАВ фаолияти тўхтатилган. 8 январдан буён юзлаб газета ва нашрлар сукут сақламоқда, ахборот майдонида асосан давлат назоратидаги ОАВ қолган.
Суриштирув натижаларига кўра, энг кўп қурбонлар 8–9 январь кунлари қайд этилган. Манбалар бу воқеаларни тасодифий тўқнашув эмас, балки олдиндан режалаштирилган ва мувофиқлаштирилган куч ишлатиш деб баҳоламоқда. Ҳалок бўлганларнинг катта қисмини 30 ёшгача бўлган фуқаролар ташкил этгани таъкидланмоқда.
Iran International маълумотига кўра, намойишчиларга қарши асосан “Ислом инқилоби муҳофизлари корпуси” ва"«Басиж" бўлинмалари жалб қилинган. Расмий идоралар қурбонлар сонини эълон қилишдан бош тортмоқда. Дастлаб иқтисодий муаммоларга қарши бошланган норозиликлар қисқа фурсатда сиёсий тус олиб, Эрон тарихидаги энг оғир ички инқирозлардан бирига айлангани қайд этилмоқда.
