Россия 2025 йилда 2,5 мингдан ортиқ украиналик тинч аҳолини ўлдирган

 

Россия томонидан 2022 йилда Укарианаг қарши тўлиқ миқёсда уруш бошланганидан буён 2025 йил укарианлик тинч аҳоли учун энг қонли йил бўлди. Ўтган йил давомида 2 500 дан орти тинч аҳоли ҳалок бўлган. Бу ҳақда СНН хабар қилди.

 

БМТнинг Украинадаги Инсон ҳуқуқлари мониторинг миссияси маълум қилишича, 2025 йилда можарога алоқадор зўравонликлар оқибатида 2 514 нафар тинч аҳоли ўлдирилган, 12 142 киши жароҳатланган. Қурбонларнинг деярли барчаси Россия томонидан Украина назоратидаги ҳудудларга қилинган ҳужумлар натижасида ҳалок бўлган ёки жароҳат олган.

 

БМТнинг 12 январда эълон қилган янги ҳисоботида аниқ қайд этилишича, Украинада хавфсиз ҳудуд қолмаган: ҳалок бўлган ёки яраланган тинч аҳолининг учдан бир қисмидан кўпроғи фронт чизиғидан анча узоқ жойларда Россия ҳужумларига учраган.

 

2025 йилда Россия Украина шаҳарларига қарши ҳаво ҳужумлари кампаниясини кескин кучайтирган, дрон ва ракеталар ёрдамида кенг кўламли зарбалар бериб, мунтазам равишда тинч аҳолини ваҳимага солиб келган.

 

Пайшанба, 8 январга ўтар кечаси Россия зарбалари Киев ва Украинанинг марказий ҳудудларидаги турар жой биноларини нишонга олди. Совуқ ҳаво шароитида ўн минглаб одамлар электр таъминотисиз қолди.

 

Россия Ғарбий Украинага ўзининг энг илғор қуролларидан бири — «Орешник» баллистик ракетаси билан зарба берди.

 

Биргина ўтган ҳафта Россия бир кечада 242 та дрон, 14 та баллистик ракета ва 22 та қанотли ракета учириб, бир нечта шаҳарларни нишонга олди. Ҳужумлар асосан фуқаролик энергетика инфратузилмасига қаратилган бўлиб, натижада юз минглаб украиналиклар электр ва иссиқлик таъминотисиз қолган.

 

“Бу ўсиш нафақат фронт чизиғидаги жангларнинг кучайиши, балки узоқ масофага зарба берувчи қуроллардан фойдаланишнинг кенгайгани билан ҳам боғлиқ. Бу эса бутун мамлакат бўйлаб тинч аҳолининг хавф остида қолишига олиб келди”, — деди Украинадаги БМТ мониторинг миссияси раҳбари Даниелле Белл.

 

БМТга кўра, энг қонли ҳужумлардан бири 19 ноябрь куни Ғарбий Украинадаги Тернопил шаҳрида содир бўлган. Ушбу зарба оқибатида камида 38 нафар тинч аҳоли, жумладан саккиз нафар бола ҳалок бўлган, яна 99 киши, жумладан 17 нафар бола жароҳатланган. Маълумотларга кўра, 10 та оила икки ёки ундан ортиқ яқин аъзосини йўқотган.

 

БМТ тасдиқланган маълумотларига кўра, Россия 2022 йил февралида урушни бошлаганидан бери камида 14 900 нафар тинч аҳоли ҳалок бўлган.

 

Шу билан бирга, Бирлашган Миллатлар Ташкилоти аввал ҳам таъкидлаганидек, ҳақиқий қурбонлар сони бундан анча юқори бўлиши мумкин, чунки кўплаб ҳолатлар ҳали тасдиқланмоқда. БМТ босиб олинган ҳудудларга кира олмайди ва фронт яқинидаги ҳудудларга кириш имконияти ҳам чекланган.