АҚШда фирибгарликда айбланган иммигрантларнинг фуқаролиги бекор қилинади

 

АҚШ президенти Доналд Трамп фуқароликка қабул қилинган иммигрантлар АҚШ фуқароларига қарши фирибгарликда иштирок этгани аниқланса, уларнинг фуқаролиги бекор қилинишини эълон қилди. Бу ҳақда у Мичиган штатининг Детройт шаҳрида сўзлаган нутқида маълум қилди деб хабар берди ТАСС.

 

Президентнинг таъкидлашича, мазкур чора, хусусан, Сомали ёки бошқа давлатлардан келиб, АҚШ фуқароларини алдаганликда айбланаётган шахсларга нисбатан қўлланади.

 

“Агар кимдир Америкага америкаликларни талаш учун келган бўлса, биз уни қамоққа оламиз ва келган жойига қайтариб юборамиз. Фуқароларимизни алдаганликда айбланган ҳар қандай фуқароликни олган иммигрантларнинг фуқаролигини бекор қиламиз”, — деди Трамп.

 

Унинг сўзларига кўра, АҚШ маъмурияти фуқаролар хавфсизлиги ва молиявий манфаатларини ҳимоя қилиш учун иммиграция сиёсатини янада қатъийлаштиришда давом этади.

 

Эслатиб ўтамиз, аввалроқ 2025 йилда АҚШ Давлат департаменти 100 мингдан ортиқ хорижий визани, жумладан, қарийб 8 минг талаба визасини бекор қилгани ҳақида хабар берилганди. Бу кўрсаткич 2024 йилда, Жо Байден маъмурияти даврида бекор қилинган визалар сонидан икки баравар кўпдир.