Ўзбекистонга совуқ антитциклон кириб келмоқда
Антитциклон туфайли уч кун давомида ҳаво ифлосланиши кучайиши мумкин.
Республика ҳудудига совуқ антитциклон яқинлашмоқда. Жараён босқичма-босқич кечиши кутилмоқда ва бу аввал экологик вазиятнинг вақтинча ёмонлашишига, кейинчалик эса ҳаво ҳароратининг сезиларли пасайишига олиб келади.
Ўзгидромет маълумотларига кўра, антитциклон кириб келиши даврида атмосфера ҳавосининг алмашинуви сустлашади. Натижада ҳавода ифлослантирувчи моддалар ҳамда майда чанг зарралари — PM2.5 ва PM10 концентрацияси ортиши мумкин. Мутахассислар прогнозига кўра, юқори даражадаги ҳаво ифлосланиши уч кунгача сақланиб туриши эҳтимоли бор.
Антитциклон таъсири 16–17 январ кунларига келиб кучаяди. Ушбу даврда мамлакатнинг деярли барча ҳудудларида ҳаво ҳарорати пасаяди. Кундузги ҳарорат пасайиши, кечаси ва эрталаб эса совуқлар кучайиши кутилмоқда.
Шу билан бирга, совуқ антитциклон айрим ҳудудларда қисқа муддатли ёмғир ёки қор ёғишини ҳам келтириб чиқариши мумкин. Синоптикларнинг таъкидлашича, ёғингарчилик ва кучли шамоллар атмосферада тўпланган чанг зарраларини камайтириб, республика бўйлаб ҳаво сифатининг вақтинча яхшиланишига хизмат қилади.
