Европа Иттифоқи Эрон гвардиясини террорчилар рўйхатига киритишни режалаштирмоқда
Намойишчиларга қарши кўрсатилинаётган зўравонлик кескин муҳокамага сабаб бўлмоқда.
Эрон ҳукумати томонидан намойишчиларга нисбатан куч ишлатилиши фонида Европа Иттифоқида Ислом инқилоби қўриқчилари корпусини (IRGC) террорчи ташкилотлар рўйхатига киритиш масаласи яна кескин муҳокамага сабаб бўлди. Германия ва Болтиқбўйи давлатлари ушбу тузилмани Даиш ва Ал-Қоида қаторида террорчи деб тан олиш ташаббусини илгари сурмоқда. Бу ҳақда Euronews хабар бермоқда.
Агар IRGC Европа Иттифоқининг террористик рўйхатига киритилса, унинг аъзоларига нисбатан активларни музлатиш, саёҳат тақиқи ва молиявий операцияларни чеклаш каби чоралар қўлланилади. Брюсселдаги дипломатик манбаларга кўра, сўнгги ҳафталарда Эрондаги намойишларда ҳаддан ташқари зўравонлик ишлатилгани ушбу масалани қайта кун тартибига олиб чиқди, бироқ ҳозирча расмий ёзма таклиф киритилмаган.
АҚШда жойлашган Эрон инсон ҳуқуқлари ташкилотлари норозилик намойишлари давомида 2000 дан ортиқ киши ҳалок бўлган бўлиши мумкинлигидан хавотир билдирмоқда. Нидерландия, Франция ва Европа Парламенти вакиллари IRGCни террорчи деб тан олишни эронлик намойишчилар билан бирдамликнинг аниқ белгиси сифатида кўрмоқда. АҚШ, Канада ва Австралия аллақачон ушбу тузилмани хорижий террорчи ташкилот деб эълон қилган.
Шу билан бирга, Европа Иттифоқи ичида ҳуқуқий ва сиёсий тўсиқлар сақланиб қолмоқда. Амалдаги қоидаларга кўра, террорчи рўйхатга киритиш учун аъзо давлат судининг қарори ва барча давлатларнинг бир овоздан розилиги талаб этилади. Франция, Италия ва Испания эҳтиёткор позицияда қолмоқда, айрим давлатлар эса бу қарор Эронга нисбатан вазиятни янада кескинлаштириши мумкинлигидан хавотирда.
