Россияда ўзбекистонлик эркак ҳамкасбини пичоқлагани учун бир йилга қамалди
Жазо муддати тугагач, судланувчи Россиядан депортация қилинади.
Россияда ишлаётган Ўзбекистон фуқароси ҳамкасбига пичоқ билан тан жароҳати етказгани учун суд ҳукми билан бир йилга озодликдан маҳрум этилди.
Россиянинг Ямало-Ненетс автоном округи суди 39 ёшли Ўзбекистон фуқаросини қасддан оғир тан жароҳати етказишда айбдор деб топди. Суд материалларига кўра, у ҳамкасбига ҳаёт учун хавфли бўлган тан жароҳати етказган.
Ямало-Ненетс автоном округи прокуратураси матбуот хизматининг маълум қилишича, ҳодиса 2025 йил центабр ойида Аксарка шаҳрида содир бўлган. Можаро вақтида айбланувчи жабрланувчининг қорин қисмига пичоқ билан зарба берган. Воқеадан сўнг у ҳуқуқни муҳофаза қилувчи органлар томонидан қўлга олиниб, тергов ҳибсхонасига жойлаштирилган.
Суд қарорига мувофиқ, эркак Россия Федерацияси Жиноят кодексининг 111-моддаси 2-қисми — одам ҳаёти учун хавфли бўлган қасддан оғир тан жароҳати етказиш жиноятини содир этганликда айбдор деб топилган. Унга умумий тартибли жазони ижро этиш колониясида бир йил муддатга озодликдан маҳрум қилиш жазоси тайинланган.
Суд жараёнида судланувчи ўз айбини тўлиқ тан олгани ва қилган ишидан пушаймонлигини билдиргани қайд этилган.
Маълумотларга кўра, ҳукм ҳозирча қонуний кучга кирмаган. Белгиланган жазони ўтаб бўлгач, судланувчи Россия ҳудудидан депортация қилинади.
