Тошкентда қарзини сохта доллар билан тўлаган шахс ушланди
Гумонланувчи танишидан олган 4 минг долларни қалбаки купюралар билан қоплашга уринган.
Тошкент шаҳрида қарзини сохта АҚШ долларлари билан тўлашга уринган шахс қўлга олинди. Бу ҳақда Иқтисодий жиноятларга қарши курашиш департаменти маълум қилди.
Маълум бўлишича, илгари судланган фуқаро Р.Т. таниши М.Х. нинг ишончига кириб, 4 тонна помидор етказиб бериш ваъдаси эвазига ундан 4 минг АҚШ доллари олган. Бироқ ушбу маблағ маҳсулот етказиб беришга сарфланмай, гумонланувчининг шахсий эҳтиёжларига ишлатилган.
Пулни қайтармаслик мақсадида Р.Т. 100 долларлик қалбаки купюралардан жами 4 минг доллар тайёрлаб, қарзни шу йўл билан ёпишга уринган. Сохта пуллар ўтказилаётган вақтда ҳолат фош этилиб, гумонланувчи ашёвий далиллар билан қўлга олинган.
Мазкур ҳолат юзасидан Жиноят кодексининг фирибгарлик ҳамда қалбаки пул ва қимматли қоғозларни тайёрлаш ва муомалага киритиш билан боғлиқ моддалари асосида жиноят иши қўзғатилди. Ҳозирда тергов ҳаракатлари олиб борилмоқда.
