Украинадаги келишув Киев позицияси сабабли кечикмоқда — Трамп
АҚШ президенти тинчлик музокаралари Зеленский сабаб секинлашаётганини билдирди.
АҚШ президенти Доналд Трамп Украинадаги можаронинг чўзилиб кетишида Киевнинг позициясини асосий сабаб сифатида кўрсатди. Бу ҳақда у 14 январ куни Reuters агентлигига берган интервьюсида маълум қилди.
Трампнинг таъкидлашича, потенциал тинчлик келишувининг кечикишига Москва эмас, балки Киев томони тўсқинлик қилмоқда. “Россия эмас, балки Украина эҳтимолий тинчлик келишувига тўсқинлик қилмоқда”, — деди АҚШ президенти.
Унинг сўзларига кўра, Россия президенти Владимир Путин можарони тугатишга тайёрлигини намоён қилмоқда, бироқ Украина раҳбари Владимир Зеленский келишувга унчалик мойил эмас. Трамп Зеленскийнинг позициясини изоҳлар экан, тафсилотларга тўхталмасдан, “буни амалга ошириш унинг учун қийин” эканини қайд этди.
Reuters маълумотига кўра, бир нечта муваффақиятсиз музокара уринишларидан сўнг, АҚШ сўнгги ҳафталарда эътиборни можаро якунланганидан кейин Украина учун хавфсизлик кафолатларини муҳокама қилишга қаратган. Хусусан, Вашингтон Киевни Донбасс масаласида муросага келишга ундаётгани айтилмоқда.
Шу билан бирга, Владимир Зеленский Украина Конституциясида ҳудудий яхлитликка оид чекловлар мавжудлигини таъкидлаб, Россияга ҳар қандай ҳудудий имтиёзларни рад этиб келмоқда.
