Ўзбекистонда поездлар чипталари нархлари 15 фоизга оширилмоқда
Ўзгаришлар хизмат сифати ва эксплуатация харажатлари билан изоҳланди.
“Ўзбекистон темир йўллари” АЖда амалга оширилаётган ислоҳотлар доирасида йўловчи ташиш соҳасида бозор тамойилларига асосланган тарифлар шакллантирилган. Бу ҳақда Ўзбекистон темир йўллари матбуот хизмати хабар берди.
Юқори тезликда ҳаракатланувчи электропоездларга техник хизмат кўрсатиш ва эҳтиёт қисмлар харажатларининг ошиши, электр энергияси ҳамда эксплуатация харажатларининг кўпайиши, ҳаракат хавфсизлигини тўлиқ таъминлаш, хизматлар сифатини халқаро стандартлар даражасида сақлаш, шунингдек, инфратузилмани доимий модернизация қилиш заруратини инобатга олиб, 2026 йил 1 февралдан бошлаб «Афросиёб» электропоездлари чипта нархлари 15 фоизга оширилади.
Янгиланган чипта нархлари қуйидагича белгиланди:
Тошкент — Бухоро
- VIP — 1 138 000 сўм
- Бизнес — 760 000 сўм
- Эконом — 509 000 сўм
Тошкент — Қарши
- VIP — 976 000 сўм
- Бизнес — 642 000 сўм
- Эконом — 429 000 сўм
Тошкент — Самарқанд
- VIP — 709 000 сўм
- Бизнес — 455 000 сўм
- Эконом — 311 000 сўм
Шунингдек, «Шарқ», «Насаф» ва «Ўзбекистон» йўловчи поездлари учун ҳам чипта нархлари 15 фоизга оширилди.
Маълумот учун, Ўзбекистон Республикаси Президентининг 2023 йил 10 октябрдаги ПҚ-329-сонли қарорига мувофиқ, 2024 йил 1 январдан бошлаб юқори тезликдаги ва тезюрар поездларда йўловчи ташиш тарифларини давлат томонидан тартибга солиш амалиётидан воз кечилиб, нархлар бозор механизмлари асосида шакллантирилган.
