Фарғонада 14 ёшли қиз тўрт нафар шахс томонидан зўрлангани айтилмоқда

 

Ижтимоий тармоқларда Фарғона вилоятининг Учкўприк туманида вояга етмаган, 14 ёшли қизга нисбатан бир гуруҳ шахслар томонидан зўравонлик содир этилгани ҳақида хабарлар тарқалди.

 

Мазкур ҳолат юзасидан Ички ишлар вазирлиги хотин-қизлар ва болалар масалалари бўйича бошқарма бошлиғи Нилуфар Ғиёсова Газета нашрига маълум қилишича, воқеа юзасидан Учкўприк тумани ИИБ ҳузуридаги тергов бўлими томонидан 2026 йил 10 январь куни Ўзбекистон Республикаси Жиноят кодексининг 118-моддаси 3-қисми (номусга тегиш) билан жиноят иши қўзғатилган.

 

Дастлабки тергов давомида гумон қилинувчи шахслар Ўзбекистон Республикаси Жиноят-процессуал кодексининг 221-моддаси талабларига мувофиқ ушланган. Суд қарорига асосан уларга нисбатан қамоқ эҳтиёт чораси қўлланган.

 

Айни пайтда жиноят иши доирасида барча зарур тергов ҳаракатлари олиб борилмоқда. Тергов жараёнлари Фарғона вилояти Ички ишлар бошқармаси томонидан амалга оширилмоқда.

 

Болалар омбудсманининг Газета нашрига маълум қилишича, мазкур жиноят ишига оид тафсилотларни кенг жамоатчиликка ошкор этиш бола манфаатларига зид ҳисобланади. Хусусан, жабрланувчи вояга етмаган шахсга оид шахсий маълумотлар ва ҳолат тафсилотларининг оммавий ахборот воситаларида кенг тарқатилиши боланинг ҳуқуқлари ва руҳий ҳолатига салбий таъсир кўрсатиши мумкин.