Жанубий Кореянинг собиқ президенти 5 йилга қамалди

 

Сеул марказий округ суди 2024 йил декабрь ойида ҳарбий ҳолат жорий этган, жумладан ҳибсга олишга тўсқинлик қилган собиқ президент Юн Сок Ёльни беш йилга озодликдан маҳрум этди, деб хабар беради Yonhap агентлиги.

 

Бу ҳукм собиқ президентга нисбатан чиқарилган биринчи қарор ҳисобланади. Korea Herald нашрининг аниқлашича, прокуратура Юн Сок Ёльга нисбатан жами 10 йиллик қамоқ жазосини сўраган эди: ҳибсга олишга қаршилик кўрсатгани учун беш йил, ҳарбий ҳолат тўғрисидаги фармонни қайта кўриб чиққани учун икки йил, вазирлар маҳкамаси аъзоларининг мунозара ҳуқуқларини бузганлиги, хорижий оммавий ахборот воситаларида ёлғон маълумот тарқатгани ва далилларни йўқ қилгани учун эса уч йил.

 

Коррупция бўйича тергов бош инспекцияси (CIO) 2024 йил январь ойида Юн Сок Ёльни хиёнат ва исён иши бўйича сўроқ қилишга чақирувларни уч марта эътиборсиз қолдирганидан сўнг ҳибсга олишга уринган. Суд ҳибсга олиш ва тинтув ордерини чиқарди, аммо президент хавфсизлик хизмати билан бир неча соатлик қарама-қаршиликдан сўнг терговчилар уни ҳибсга олишни тўхтатдилар. Кейинчалик Юн ҳибсга олинган.

 

Собиқ президентга саккизта айблов билан иш қўзғатилган. Кейинги суд мажлиси тўнтариш уюштиришда айбланиш масаласи бўйича 2026 йил 19 февралга белгиланган. Прокуратура Юн Сок Ёльни суд ва қонун чиқарувчи ҳокимиятни эгаллаб олиш орқали ҳокимиятни сақлаб қолишга интилган тўнтариш раҳбари сифатида таърифлаб, унга ўлим жазосини сўраган.