Россияда тиббий маълумотномаларни сохталаштирган мигрантларга қамоқ жазосини бериш таклиф қилинди
Шунингдек, сохта тиббий ҳужжатлар учун миллион рублгача жарима белгиланиши ҳам мумкин.
Россияда сохта тиббий маълумотномалардан фойдаланган мигрантларга нисбатан жиноий жавобгарликни кучайтириш режалаштирилмоқда. Тегишли қонун лойиҳаси Давлат Думасига киритилди. Бу ҳақда Давлат Думаси раиси ўринбосари Ирина Яровая маълум қилди деб хабар беради Тасс.
Унинг сўзларига кўра, санитария-эпидемиологик хавфсизликни таъминлаш ва юқумли касалликларнинг олдини олиш нуқтайи назаридан тиббий ҳужжатларнинг аҳамияти юқори баҳоланмоқда. Шу сабабли, сохта тиббий маълумотномадан фойдаланган шахслар тўрт йилгача озодликдан маҳрум этилиши ва 500 мингдан 1 миллион рублгача жаримага тортилиши мумкин.
Қонун лойиҳасида, шунингдек, тиббий маълумотномани қалбакилаштириш, уни расмий лавозимдан фойдаланиб ёки онлайн тарзда тарқатиш ҳолатлари учун жазони оғирлаштирувчи нормалар киритилиши кўзда тутилган.
Агар бундай ҳуқуқбузарликлар оммавий инфекция тарқалишига сабаб бўлса, айбдор шахсларга нисбатан саккиз йилгача озодликдан маҳрум қилиш жазоси қўлланиши мумкинлиги қайд этилди.
