Трамп Гренландия бўйича режаларига қарши чиққан мамлакатларга божлар билан таҳдид қилди

 

АҚШ президенти Доналд Трамп АҚШнинг Гренландия бўйича режаларини қўллаб-қувватламайдиган давлатларга нисбатан божлар жорий этилиши мумкинлигини маълум қилди. Ушбу баёнот Оқ уйда бўлиб ўтган тадбир чоғида янгради.

 

СНН келтирган иқтибосга кўра, Трамп Гренландияни АҚШ миллий хавфсизлиги учун муҳим ҳудуд деб атаган ва қаршилик билдирган мамлакатларга тарифлар қўллаш ҳуқуқига эгалигини таъкидлаган. Президент бу жараёнда ўзини “тарифлар қироли” сифатида тавсифлаган.

 

Телеканалнинг аниқлик киритишича, Трамп бу фикрларни дори-дармон нархларини пасайтириш бўйича музокараларда тарифлардан босим воситаси сифатида қандай фойдаланганини тушунтирар экан билдирган.

 

2025 йил январь ойида Оқ уйга қайтганидан буён Доналд Трамп бир неча бор АҚШ Гренландия устидан назоратни қўлга олиши лозимлигини айтиб келмоқда. У ҳатто бу мақсадга эришишда куч ишлатиш эҳтимолини ҳам истисно қилмаган.

 

Трамп Данияни минтақа хавфсизлигини етарли даражада таъминламаётганликда айблаб, Гренландия яқинида Россия ва Хитой кемалари кўпайганини даъво қилган. Бироқ Европа дипломатлари ва гренландиялик расмийлар бу маълумотларни асоссиз деб рад этган.

 

Шу билан бирга, Politico нашрининг ёзишича, Европа Иттифоқи Гренландияга нисбатан эҳтимолий босим ёки куч ишлатилишига жавобан чоралар ишлаб чиқмоқда. Вариантлар орасида АҚШ компанияларига тариф ва солиқлар жорий этиш ҳамда инвестицияларни чеклаш масалалари бор.

 

Politico маълумотига кўра, Трампнинг баёнотларидан сўнг Франция, Германия, Швеция ва Норвегия каби олти давлат Гренландияга қўшин юбориш бўйича қарор қабул қилган.