Кореяда нолегал ишлаётган ўзбекистонликлар сони тобора ошмоқда

 

 

Жанубий Кореяда ишлаётган ўзбекистонлик меҳнат мигрантлари орасида нолегал статусга ўтаётганлар сони кескин кўпаймоқда. Ҳозирда бу кўрсаткич 9 фоизга етган бўлиб, агар у 10 фоиздан ошса, Корея Адлия вазирлиги Ўзбекистон фуқароларига виза беришни тўлиқ тўхтатиши мумкин. Бу ҳақда Ўзбекистоннинг Кореядаги элчиси Алишер Абдусаломов 17 январь куни Тошкентда бўлиб ўтган элчилар ва тадбиркорлар учрашувида маълум қилди.

 

Элчининг айтишича, Кореяга расмий тартибда бориб, кейинчалик иш жойини ташлаб, ноқонуний ишлашга ўтаётган ўзбекистонликлар сони ортиб бормоқда. Ҳозирда Кореяда қарийб 100 минг нафар ўзбекистонлик яшайди ва уларнинг деярли 9 фоизи нолегал ҳолатда меҳнат қилмоқда. Дипломат бу ҳолат Ўзбекистоннинг халқаро имижига жиддий салбий таъсир кўрсатаётганини таъкидлади.

 

Муаммо фақат меҳнат миграцияси билан чекланмай, таълим соҳасига ҳам тааллуқли. Элчининг сўзларига кўра, Кореяга тил курслари ёки университетларга ўқишга келган айрим ёшлар таълимни ташлаб, ишлаш мақсадида виза талабларини бузмоқда. Бу эса тартибли миграцияга тўсқинлик қилиб, корейс иш берувчилари орасида ўзбекистонлик ишчиларга нисбатан салбий муносабат шаклланишига олиб келмоқда.

 

Шунингдек, Алишер Абдусаломов Корея ҳар йили Ўзбекистонга E-8 мавсумий виза тури бўйича 5 мингта квота ажратишини, бироқ амалда атиги 600 га яқин квотадан фойдаланилаётганини билдирди. Ҳозирда Ўзбекистондан Кореяга ишчилар фақат Миграция агентлиги орқали юборилмоқда. Расмий маълумотларга кўра, Жанубий Кореяда ўқиётган хорижий талабалар орасида виза қоидаларини энг кўп бузаётганлар қаторида ўзбекистонликлар ҳам бор: 2024 йилда D-2 талабалик визаси билан келиб қоидабузарлик қилганларнинг 13 фоизи Ўзбекистон фуқаролари бўлган.