Ўзбекистонликлар учун АҚШ визасини соддалаштириш ишлари бошланган
Ўзбекистоннинг АҚШдаги элчиси Фурқат Сиддиқов виза режимини енгиллаштириш бўйича музокаралар бошланганини маълум қилди.
Ўзбекистон фуқаролари учун АҚШ визасини олиш жараёнини соддалаштириш бўйича музокаралар бошланган. Бу ҳақда Ўзбекистоннинг АҚШдаги элчиси Фурқат Сиддиқов “Daryo” нашрига берган интервьюсида маълум қилди. Унинг таъкидлашича, мазкур йўналишда изчил ишлар олиб борилмоқда, бироқ тезкор натижага эришиш осон эмас.
Элчининг сўзларига кўра, АҚШга визасиз режим жорий этилиши узоқ муддат талаб қиладиган мураккаб жараён ҳисобланади. Чунки виза сиёсати, аввало, Америка ҳукуматининг ички қарорларига боғлиқ. Шунга қарамай, расмий Тошкент нафақат АҚШ, балки Бразилия, Канада ва бошқа қатор давлатлар билан ҳам Ўзбекистон фуқаролари учун визасиз сафар имкониятларини кенгайтириш бўйича музокараларни давом эттирмоқда.
Фурқат Сиддиқов бугунги кунда Ўзбекистон–АҚШ муносабатлари тарихий даражада мустаҳкамланганини қайд этди. Унинг айтишича, сўнгги бир йил ичида икки давлат президентлари ўртасида тўрт маротаба мулоқот бўлиб ўтган. Телефон суҳбатлари ва Ню Ёрк ҳамда Вашингтондаги учрашувлар натижасида кенг қамровли келишувларга эришилган бўлиб, бу АҚШнинг Ўзбекистондаги ислоҳотларга ва мамлакат салоҳиятига бўлган юқори эътиборини кўрсатади.
Шунингдек, элчи 2026 йил январь ойи охиридан бошлаб Ўзбекистонда АҚШ фуқаролари учун 30 кунгача бўлган визасиз режим жорий этилишини маълум қилди. Ушбу қарор натижасида Америкадан Ўзбекистонга келувчи сайёҳлар сони бир неча баробарга ошиши кутилмоқда. Аввалроқ АҚШ фуқаролари учун визасиз тартиб 2026 йил 1 январдан кучга кириши ҳақида хабар берилганди.
