Аҳоли ва қишлоқ хўжалигини рўйхатга олиш солиққа тортиш ёки текширувлар учун ўтказилмайди — Статистика қўмитаси

 

Ўзбекистонда ўтказилаётган аҳоли ва қишлоқ хўжалигини рўйхатга олиш жараёни юзасидан фуқаролардан келиб тушаётган саволларга Статистика қўмитаси расмий изоҳ берди. Қўмита мазкур тадбир солиққа тортиш, текширув ўтказиш ёки жарима қўллаш билан мутлақо боғлиқ эмаслигини маълум қилди.

 

Қайд этилишича, айрим фуқаролар уй-жойи, ер майдони ёки чорва моллари ҳақидаги маълумотлар кейинчалик ортиқча солиқ солинишига сабаб бўлишидан хавотир билдирган. Статистика қўмитаси бундай хавотирлар асоссиз эканини таъкидлаб, рўйхатга олиш жараёнида берилган барча маълумотлар қонун асосида қатъий махфий сақланишини билдирди.

 

Қўмита баёнотига кўра, саволномаларда келтирилган жавоблар ҳеч қайси бошқа давлат идорасига узатилмайди ҳамда солиққа тортиш ёки назорат тадбирларида фойдаланилмайди. Тўпланган маълумотлар фақат умумлаштирилган статистик таҳлил учун хизмат қилади. Яъни, ер майдонлари ёки чорва сони алоҳида шахслар ёки хонадонлар кесимида эмас, балки умумий кўрсаткичлар асосида эълон қилинади.

 

“Аҳоли ва қишлоқ хўжалигини рўйхатга олишдан кўзланган мақсад — мамлакатдаги реал ҳолатни аниқлаш, аҳоли сони ва турмуш шароитлари, қишлоқ хўжалиги салоҳиятини баҳолашдир. Бу орқали қайси ҳудудда қанча маҳсулот етиштирилаётгани ва у аҳоли эҳтиёжини қанчалик қоплаётгани аниқланади”, дейилади расмий хабарда.

 

Мазкур маълумотлар асосида давлат озиқ-овқат хавфсизлигини таъминлаш, қишлоқ хўжалигини қўллаб-қувватлаш, инфратузилмани ривожлантириш ҳамда ижтимоий хизматларни самарали режалаштириш имкониятига эга бўлиши таъкидланган.

 

Маълумот учун, Ўзбекистонда 15 январдан 31 январгача аҳоли ва қишлоқ хўжалигини онлайн рўйхатга олиш ишлари олиб борилмоқда. Фуқаролар census.stat.uz сайти орқали 71 та саволга жавоб беришлари мумкин. Февраль ойидан бошлаб эса рўйхатга олиш ишлари уйма-уй юриш шаклида давом эттирилади.