Ўзбекистонда қурилишда бахтсиз ҳодисалар оқибатида ҳалок бўлганлар сони ортди
Расмий маълумотларга кўра, 2025 йилда қурилиш майдонларида ҳалок бўлганлар сони қарийб 100 нафарга етган.
Ўзбекистонда қурилиш соҳасида меҳнат фаолияти билан боғлиқ бахтсиз ҳодисалар ва улар оқибатидаги ўлим ҳолатлари кескин ошди. Камбағалликни қисқартириш ва бандлик вазирлиги маълумотига кўра, 2024 йилда соҳага оид 204 та бахтсиз ҳодиса қайд этилиб, 71 нафар ишчи вафот этган.
2025 йилда эса ҳолат янада оғирлашган. Ўтган йил давомида қурилиш соҳасида 234 та бахтсиз ҳодиса содир бўлган бўлиб, улар оқибатида 99 нафар ишчи ҳаётдан кўз юмган. Шу тариқа, меҳнат жараёнида энг кўп ўлим ҳолатлари айнан қурилиш соҳасида қайд этилган.
Вазирликнинг таъкидлашича, аксарият фожиали ҳолатлар меҳнат хавфсизлиги қоидаларига риоя қилинмаслиги, ишчиларнинг шахсий ҳимоя воситалари билан етарлича таъминланмагани ҳамда назорат механизмларининг сустлиги билан боғлиқ.
Мутасаддилар меҳнат хавфсизлиги масаласига лоқайд қараш инсон ҳаёти учун жиддий хавф туғдиришини қайд этиб, бу талаблар фақат ҳисобот учун эмас, балки реал ҳаётни асраш учун зарурлигини эслатмоқда.
