Қосим-Жомарт Тоқаев Трампнинг Ғазо тинчлик кенгашига қўшилиш таклифига рози бўлди

 

Қозоғистон Президенти Қосим-Жомарт Тоқаев янги ташкил этилган Ғазо Тинчлик Кенгашига қўшилиш ва Қозоғистоннинг таъсисчи аъзо сифатида иштирок этиш учун АҚШ Президенти Доналд Трампдан расмий таклифнома олган. Бу ҳақда Президентнинг ёрдамчиси ва матбуот котиби Руслан Желдибай Tengrinews.kz нашрига берган интервьюсида маълум қилди.

 

АҚШ томонидан ташкил этилаётган Тинчлик Кенгаши стратегик назорат, халқаро ресурсларни сафарбар қилиш ҳамда Ғазони тинч йўл билан ривожлантириш мажбуриятларини мониторинг қилишга масъул бўлади. Таъсисчи ижроия кенгаши етти нафар дипломатия, ривожланиш, инфратузилма ва иқтисодий стратегия соҳасидаги тажрибали етакчидан иборат бўлиб, ҳар бир аъзо Ғазони барқарорлаштиришда муҳим соҳа учун жавобгар ҳисобланади.

 

Руслан Желдибай таъкидлаганидек, Тоқаев АҚШга миннатдорчилик билдирган ва кенгашга қўшилиш бўйича розилигини расмий хат орқали тасдиқлаган. Президент Қозоғистоннинг Яқин Шарқдаги тинчликни мустаҳкамлаш, давлатлараро ишончни ошириш ва глобал барқарорликка ҳисса қўшишга содиқлигини қайд этди. Розилик олингач, кенгашга қўшилишга розилик билдирган барча давлатлар рўйхати оммага эълон қилинади.