Хитойда туғилиш даражаси 1949 йилдан бери энг қуйи кўрсаткичга тушди
Бу аҳоли сонининг кетма-кет тўртинчи йил камайиши ҳисобланади.
Хитойда туғилиш кўрсаткичлари 1949 йилда Халқ Республикаси ташкил топганидан буён энг паст даражага тушди. 2025 йилда ҳар минг кишига тўғри келадиган туғилиш 5,6 тани ташкил этди, йил давомида эса 7,9 миллион чақалоқ туғилди. Бу аввалги йилга нисбатан 1,6 миллионга кам бўлиб, 2020 йилдан бери кузатилган энг кескин пасайиш сифатида қайд этилди.
Туғилишнинг камайиши мамлакат умумий аҳолисига ҳам бевосита таъсир кўрсатмоқда. Расмий маълумотларга кўра, 2025 йилда Хитой аҳолиси 3,4 миллион кишига қисқарди. Бу аҳоли сонининг кетма-кет тўртинчи йил камайиши бўлиб, 2024 йил якунида мамлакат аҳолиси қарийб 1,4 миллиард нафарни ташкил этган эди.
Демографик инқироз фонида никоҳлар сони кескин камайиб, ажримлар эса ортмоқда. 2024 йилда Хитойда атиги 6,1 миллион никоҳ қайд этилиб, бу 1980 йилдан бери энг паст кўрсаткич бўлди. Шу билан бирга, ажрашиш даражаси 1,1 фоизга ошган. Мутахассислар буни ёшларнинг иқтисодий қийинчиликлар, ижтимоий босим ва ҳаёт харажатларининг юқорилиги сабаб оила қуришни кечиктираётгани билан изоҳламоқда.
Ҳукумат туғилишни рағбатлантириш учун субсидиялар, ота-она таътилларини узайтириш ва солиқ имтиёзларини жорий этаётган бўлсада, ҳозирча бу чоралар сезиларли самара бермаяпти. Шунга қарамай, Хитой иқтисодиёти 2025 йилда 5 фоиз ўсиб, ялпи ички маҳсулот ҳажми 140 триллион юанга етди. Мутахассислар эса узоқ муддатда демографик пасайиш мамлакатнинг иқтисодий барқарорлигига жиддий хавф туғдириши мумкинлигини таъкидламоқда.
