Фарғонада севган қизи билан хабар ёзишган 15 ёшли ўсмир ўзини томдан ташлади
Марҳумнинг онаси Россияга кетгани сабаб, бола опалари ва укалари билан бирга тоғасининг қарамоғида қолган.
Жорий йилнинг 13 январь куни Фарғона шаҳрида 9-синф ўқувчиси бўлган 15 ёшли ўсмир кўп қаватли уйнинг томидан сакраб, ҳаётдан кўз юмди. Мазкур ҳолат юзасидан Бош прокуратура матбуот котиби Ҳаёт Шамсутдинов Zamon.uz сўровига асосан маълумот берди.
Маълум қилинишича, марҳумнинг онаси 2025 йил 25 декабрь куни Россия Федерациясига кетган бўлиб, бола опалари ва укалари билан бирга тоғасининг қарамоғида қолган. Фожиа куни у яшаб турган 8 қаватли уйнинг том қисмига чиқиб, пастга сакраган ва воқеа жойида вафот этган.
Тезкор-суриштирув тадбирлари давомида аниқланишича, ўсмир ҳодисадан аввал ўзи ёқтирган қиз билан СМС-хабарлар орқали мулоқот қилган. Ҳозирча ушбу ёзишмалар фожианинг бевосита сабаби бўлганми ёки йўқми, аниқлаштирилмоқда.
Ҳодиса жойига Фарғона шаҳар ИИБ ва прокуратура ходимларидан иборат тезкор-тергов гуруҳи етиб борган. Айни пайтда мазкур ҳолат юзасидан терговга қадар текширув ҳаракатлари олиб борилмоқда ва барча ҳолатларга ҳуқуқий баҳо берилиши кутилмоқда.
