Испанияда содир бўлган поездлар тўқнашуви сабаб 3 кунлик мотам эълон қилинди

 

Испания Бош вазири Педро Санчеснинг маълум қилишича, Андалусия автоном ҳудудининг Кордова провинциясида юз берган икки тезюрар поезд тўқнашуви ортидан 20 январь ярим тундан 23 январь ярим тунгача расмий мотам эълон қилинади. Ҳукумат фожиа сабабларини ўрганишда мутлақ шаффофлик таъминланишини билдирди. Бу ҳақда риa новости нашри хабар берди.

 

Маълумотларга кўра, 18 январь куни кечқурун Кордова провинциясида Малага–Мадрид ва Мадрид–Уэлва йўналишларида ҳаракатланаётган икки тезюрар поезд тўқнашган. Испания транспорт вазири Оссар Пуэнте хабарига кўра, ҳодиса оқибатида 39 киши ҳалок бўлган, жароҳатланганлар сони эса 152 нафарга етган. Улардан камида 12 нафари оғир аҳволда реанимацияга жойлаштирилган.

 

Темир йўл инфратузилмаси оператори Адифнинг билдиришича, аввал Мадрид томонга кетаётган Ирё компаниясига тегишли поезд рельсдан чиқиб кетган ва тахминан 20 сониядан сўнг қарама-қарши йўналишда ҳаракатланаётган Renfe компаниясининг Аlvia поезди билан тўқнашган. Ҳодиса вақтида иккала поездда ҳам қарийб 400 нафар йўловчи бўлган.

 

Транспорт вазирлиги ҳалокат сабаблари ҳозирча аниқланмаганини маълум қилди. Renfe президенти Алваро Фернандес Ҳередиа ушбу ҳодисани «ғайриоддий» деб баҳолаб, инсон омили деярли истисно қилинаётганини таъкидлади. Маълум бўлишича, рельсдан чиққан поезд янги бўлиб, авариядан уч кун олдин техник кўрикдан ўтказилган.

 

Ушбу воқеа Испанияда 2013 йилда Сантяго-де-Компостелада содир бўлган ва 80 киши ҳалок бўлган темир йўл фалокатидан кейинги энг йирик ҳалокат сифатида қайд этилди. Ҳодисадан сўнг Мадрид ва Андалусия ўртасидаги юқори тезликдаги темир йўл қатнови вақтинча тўхтатилди.