Метан заправкалардаги чекловлар сабаб бензин чиқариш ҳажми оширилади
Кунлик автобензин савдоси 5 минг тоннагача оширилади.
«Ўзбекнефтгаз» АЖ томонидан биржа савдоларига чиқарилаётган автобензин ҳажми мавжуд талабдан келиб чиққан ҳолда оширилади.
«Ўзбекнефтгаз» АЖ матбуот хизматининг маълум қилишича, совуқ ҳаво оқими сабаб автомобилларга газ тўлдириш компрессор шохобчалари (метан заправкалар) фаолиятига қисқа муддатли чекловлар киритилаётгани муносабати билан аҳолининг ёқилғига бўлган эҳтиёжини қондириш мақсадида биржа савдоларига чиқариладиган автобензин ҳажми кўпайтирилмоқда.
Хусусан, шу кунгача биржа савдоларига кунига ўртача 3 700 тонна миқдорида автобензин чиқариб келинган бўлса, эндиликда талаб ва таклифдан келиб чиққан ҳолда ушбу кўрсаткич 5 000 тоннагача оширилади.
Мазкур чоралар ёқилғи бозорида барқарорликни таъминлаш, нархларнинг кескин ўзгариб кетишининг олдини олиш ҳамда истеъмолчилар эҳтиёжини узлуксиз қондиришга қаратилган.
