Ўзбекистонда метан “заправка”лар фаолиятига вақтинча чеклов киритилди
Жамоат транспорти ва ижтимоий соҳа учун газ таъминоти чекланмайди.
Ўзбекистонда ҳаво ҳароратининг кескин пасайиши сабабли табиий газга бўлган талаб ошгани муносабати билан автомобилларга газ тўлдириш компрессор шохобчалари (метан заправкалар) фаолиятига вақтинча чекловлар киритилди. Бу ҳақда Энергетика вазирлиги матбуот хизмати хабар берди.
Маълум қилинишича, совуқ об-ҳаво шароитида айрим ҳудудларда газ қувурларида босимнинг пасайиши ҳолатлари кузатилмоқда. Шу боис аҳоли хонадонлари, тиббиёт ва таълим муассасаларини узлуксиз табиий газ билан таъминлаш устувор вазифа этиб белгиланган.
Мазкур чекловлар аҳоли учун барқарор газ таъминотини таъминлашга қаратилган бўлиб, вазият барқарорлашиши билан метан заправкалар фаолияти босқичма-босқич тикланади.
Шу билан бирга, ижтимоий соҳа объектларига хизмат кўрсатувчи ҳамда жамоат транспорти воситалари учун газ таъминоти чекловларсиз ва барқарор тарзда амалга оширилади. Ушбу йўналишларда фаолият юритаётган транспорт воситаларининг узлуксиз ишлаши аҳолига кўрсатилаётган хизматлар сифатини таъминлашда муҳим аҳамиятга эга.
Ҳудудлардаги вазиятдан келиб чиқиб, қўшимча маълумотлар тақдим этилиши билдирилади.
