Тошкентда "Дунё гўзали 2025" танлови иштирокчиси кийимида давлат рамзларидан фойдалангани учун жаримага тортилди
Суд танловда намойиш этилган либосни қонунчиликка зид деб топган.
Тошкент шаҳри Миробод туманида бўлиб ўтган суд мажлисида “Miss Earth 2025” (“Дунё гўзали”) халқаро танлови иштирокчиси бўлган 21 ёшли Ш.М.га нисбатан давлат рамзлари тўғрисидаги қонунчиликни бузиш билан боғлиқ маъмурий иш кўриб чиқилди. Натижада у 824 минг сўм миқдорида жарима тўлашга мажбур бўлди.
Суд материалларига кўра, Ш.М. 2025 йил 28 октябрь куни Филиппиннинг Манила шаҳрида ўтказилган танловда саҳнага давлат байроғи ранглари ва республика герби тасвири туширилган образда чиққан. Кейинчалик ушбу либосдаги суратларини Инстаграм саҳифасига жойлаган.
Суд мажлисида иштирокчи либосни яратишда давлат рамзларидан фақат илҳом олинганини, кийимда байроқнинг мажбурий элементлари — ярим ой ва ўн икки юлдуз мавжуд эмаслигини, фақат ранглар уйғунлигидан фойдаланилганини таъкидлади. Шунга қарамай, даъвогар томон давлат рамзларидан кийим элементи сифатида фойдаланиш қонун билан тақиқланганини қайд этди.
Миробод туман жиноят ишлари бўйича суди Ш.М.ни Маъмурий жавобгарлик тўғрисидаги кодекснинг 203-1-моддаси 1-қисми асосида айбдор деб топди. Суд қарорига кўра, у базавий ҳисоблаш миқдорининг икки баравари — 824 минг сўм жарима тўлайди.
