Тошкентда ҳинд тилидаги реклама пешлавҳаси олиб ташланди

 

 

Ижтимоий тармоқларда Тошкент давлат тиббиёт университети яқинида ҳинд тилида ёзилган реклама пешлавҳаси ўрнатилгани ҳақида хабарлар тарқалди. Мазкур ҳолат юзасидан Тошкент шаҳар ҳокимлиги ишчи гуруҳи томонидан ўрганиш ишлари олиб борилди. Бу ҳақда Тошкент шаҳар ҳокимлиги матбуот хизмати маълум қилди.

 

Текширув давомида реклама пешлавҳаси белгиланган тартибда рухсат ҳужжатларисиз, яъни ноқонуний ўрнатилгани аниқланган. Шунингдек, унда ахборот бериш қоидаларига риоя этилмагани, “Давлат тили тўғрисида”ги ҳамда “Реклама тўғрисида”ги қонун талаблари бузилгани қайд этилган.

 

Ҳокимлик матбуот хизматининг маълум қилишича, амалдаги қонунчиликка кўра реклама ахборотлари Ўзбекистон Республикасининг давлат тилида бўлиши шарт. Зарурат туғилганда бошқа тиллардан ҳам фойдаланиш мумкин, бироқ бу ҳолатда ҳам давлат тилидаги матн устувор бўлиши ва реклама қонуний тартибда жойлаштирилиши лозим.

 

Аниқланган қоидабузарликлар асосида ҳинд тилидаги реклама пешлавҳаси белгиланган тартибда демонтаж қилинди. Тошкент шаҳар ҳокимлиги тадбиркорлик субъектларини реклама пешлавҳалари, баннерлар ва ташқи ахборот воситаларини жойлаштиришда амалдаги қонун талаблари ва рухсат бериш тартибига қатъий риоя этишга чақирди.