Андижонда 17-20 ёшдаги ёшлар иштирокидаги экстремистик гуруҳ фаолияти фош этилди

 

Андижон вилоятида ҳуқуқни муҳофаза қилувчи органлар томонидан олиб борилган тезкор тадбирлар давомида экстремистик ва террористик ғояларга алоқадор ҳолат аниқланди.

 

Андижон ИИБнинг маълум қилишича, Шаҳрихон тумани «Сарой» маҳалласида яшовчи, 2008 йилда туғилган шахс ижтимоий тармоқлар орқали террористик ва ақидапарастлик ғоялари билан йўғрилган материалларни мунтазам тинглаб келгани оқибатида Суриядаги террористик ташкилотлар таъсирига тушган. У мазкур ташкилот тарғиботчилари билан алоқа ўрнатиб, уларнинг кўрсатмалари асосида фаолият олиб борган.

 

Аниқланишича, ушбу шахс топшириққа мувофиқ Instagram ижтимоий тармоғида “ал ғариб” номли профиль очиб, Суриядаги террористик ташкилотнинг медиа маркази томонидан тайёрланган видео ва аудио материалларни жойлаштирган. Шунингдек, у Андижон вилоятининг Улуғнор ва Шаҳрихон туманларида яшовчи, 2006–2009 йилларда туғилган 13 нафар тенгдошини бирлаштирган «Ахийлар» номли виртуал гуруҳга аъзо бўлган.

 

Мазкур виртуал жамоа доирасида «жиҳод» ва «ҳижрат» мавзулари, шунингдек, халқаро террорчилик ташкилотларининг даъват ва чақириқлари муҳокама қилинган ҳамда Сурияга чиқиб кетиш режаси тузилган.

 

Ҳуқуқни муҳофаза қилувчи идоралар томонидан ўтказилган тезкор тадбирлар натижасида ушбу жамоа фаолиятига барҳам берилди ва 13 нафар ёшнинг хорижга чиқиб кетишининг олди олинди.

 

Ҳолат юзасидан жамоа аъзоларига нисбатан Ўзбекистон Республикаси Жиноят кодексининг 244-моддаси 3-қисми «г» банди билан жиноят иши қўзғатилиб, ҳозирда тергов ҳаракатлари олиб борилмоқда.