“Дубай” ва “Туркия бриллианти” тушунчалари: мутахассис қандай изоҳ берди?
Тошкентда Fonon заргарлик уйи ташаббуси билан аёллар учун қимматбаҳо тошларни тўғри танлаш ва фирибгарликдан ҳимояланиш мавзусида бепул мастер-класс бўлиб ўтди. Тадбирда иштирокчиларга халқаро стандартларга кўра тошларнинг баҳоланиш мезонлари, табиий ва сунъий тошларни фарқлаш усуллари ўргатилди.
Тадбир 17 январь куни Fonon заргарлик уйи ташаббуси билан ташкил этилиб, унда иштирокчиларга халқаро стандартларга кўра қимматбаҳо тошларнинг баҳоланиш мезонлари, табиий ва сунъий тошларни фарқлаш усуллари ҳамда сертификатларнинг ҳақиқийлигини аниқлаш техникалари ўргатилди.
Машғулотда дастлаб туркиялик лукс брендлар бўйича консультант Экрем Сағел томонидан махсус презентация тақдим этилди. Унда қимматбаҳо тошларни харид қилишда энг кўп учрайдиган хатолар ва уларнинг олдини олиш йўллари ҳақида батафсил маълумот берилди.
Халқаро майдонда 30 йиллик тажрибага эга Экрем Сағелнинг таъкидлашича, у қарийб 3 йилдан буён Ўзбекистоннинг турли ҳудудларидаги бозорларни тадқиқ қилиш учун айланиб чиққан. Мутахассис ўрганиш жараёнида олмос сифати, лаборатория ва табиий тошлар ўртасидаги фарқлар ҳамда баҳолаш шкалалари бўйича сотувчиларга саволлар ҳам бериб кўрган. Баъзан у берган саволларига қониқарли жавоб ололмаган ҳолатлари ҳам учраган.
Шунингдек, мутахассис маҳаллий бозорда оммалашган “Дубай бриллианти” ва “Туркия бриллианти” каби атамалар нотўғри талқин қилиниши ҳақида сўз юритди. Сабаби Дубай ва Туркияда олмос қазиб олинмайди. Шунинг учун, Дубай ва Туркия бриллианти эмас, у ерларда ясалган бриллиант модели дейиш тўғрироқ бўлади. Чунки oлмос дунё бўйича асосан Россия, Жанубий Африка, Ботсвана, Канада ва Ангола ҳудудларида қазиб олинади. Бундан ташқари, Экрем Сағел олтин сифати бўйича Ўзбекистон дунёда етакчи ўринлардан бирини эгаллашини ҳам қайд этди.
Тадбирнинг амалий қисми Fonon заргарлик уйи тижорат директори, қимматбаҳо тошлар ва бриллиант боʼйича эксперт Бекзод Солихов бошчилигида ташкил этилди. Бекзод Солиховнинг таъкидлашича, харидор заргарлик буюмининг сертификати айнан харид қилинаётган маҳсулотга тегишли эканлигини мустақил аниқлаши ҳамда маҳсулот сифатини ўзи текшириши ҳам мумкин.
Маҳаллий бозорда узоқ йиллар давомида ҳунармандчилик сифатида қолиб кетган заргарлик соҳаси бугунги кунда саноат даражасида шаклланиб бормоқда. Ташкилотчиларга кўра, бу турдаги мастер-классларни келгусида бутун Ўзбекистон бўйлаб заргарлар ва харидорлар учун ҳам ташкил этиш режалаштирилмоқда.
