Онлайн кредит олишда фирибгарликка учраган фуқаролардан кредитни ундириш тўхтатилади
Етказилган зарар регресс тартибида фрод содир этган шахсдан ундирилади.
Адлия вазирлиги ва Марказий банк ҳамкорлигида “Кредит ва тўлов ташкилотлари, тўлов тизими операторлари томонидан жисмоний шахсларга масофадан молиявий хизматлар кўрсатишда ахборот хавфсизлиги ва киберхавфсизликни таъминлаш ҳамда фрод ҳолатларининг олдини олиш бўйича минимал талаблар” тўғрисидаги низом давлат реестридан ўтказилди.
Низомга кўра, агар фуқаро номига онлайн кредит фрод натижасида расмийлаштирилган бўлса ва у суриштирувчи, терговчи, прокурор қарори ёки суд ажрими билан жабрланувчи деб тан олинган бўлса, кредит ташкилоти ушбу кредитни ва унга боғлиқ фоизларни ҳисоблаш ҳамда ундиришни тўхтатади.
Киритилган тартиб кредит ташкилотига фрод содир этган шахсдан етказилган моддий зарарларни регресс тартибида ундириш имконини беради.
Кредит ташкилоти фрод ҳолатига шубҳа қилганда, қонунчиликда белгиланган тартибда мурожаат қилиши мумкин.
Суриштирув, дастлабки тергов ёки суд қарорига кўра фрод ҳолати юз бермаганлиги аниқланса, кредит ва фоизларни ҳисоблаш ҳамда ундириш давом эттирилади.
