“Ўзбекистонликлар учун Европага визасиз кириш мураккаб, аммо имконсиз эмас” — элчи Дилшод Аҳатов
Ўзбекистоннинг Германиядаги элчисининг таъкидлашича, бундай режимни жорий этиш учун Евроиттифоққа аъзо барча 27 давлат, шунингдек, Шенген ҳудудига кирувчи бошқа мамлакатларнинг ҳам розилиги талаб этилади.
Ўзбекистон фуқаролари учун Европа Иттифоқи давлатларига визасиз кириш масаласи осон ҳал бўладиган жараён эмас. Ўзбекистоннинг Германиядаги элчиси Дилшод Аҳатовнинг таъкидлашича, бундай режимни жорий этиш учун Евроиттифоққа аъзо барча 27 давлат, шунингдек, Шенген ҳудудига кирувчи бошқа мамлакатларнинг ҳам розилиги талаб этилади. Чунки Германияга визасиз кириш автоматик тарзда бутун Шенген ҳудуди бўйлаб эркин ҳаракатланиш имконини беради.
Дипломатнинг айтишича, Шенген ҳудудида ички чегаралар мавжуд эмас ва бир давлатга кирган шахс бошқа мамлакатларга ҳам бемалол ўта олади. Шу сабабли визасиз режим фақат бир давлат билан эмас, балки қарийб 30 дан ортиқ мамлакат билан бир вақтнинг ўзида келишувни талаб қилади. Элчи бу масала келажакда босқичма-босқич ҳал бўлиши мумкинлигини, бироқ олдинда ечилиши лозим бўлган муаммолар кўплигини қайд этди.
Шу билан бирга, Германия бугунги кунда чет эллик ишчи кучига жуда муҳтож. Бунга мамлакатдаги демографик вазият сабаб бўлмоқда: аҳоли сони секин ўсмоқда, туғилиш даражаси паст, кексалар сони эса ортиб бормоқда. Натижада Германия иқтисодиётни ушлаб туриш учун хориждан малакали мутахассисларни фаол жалб қилмоқда. Асосий талаблар — немис тилини билиш ва касбий тайёргарликка эга бўлиш.
Элчи Аҳатовнинг сўзларига кўра, 2024 йилда Германия ва Ўзбекистон ўртасида миграция ва мобиллик бўйича имзоланган битим ижобий натижа бермоқда. 2025 йилнинг ўзида икки мингдан ортиқ ўзбекистонлик ёш мутахассис Германияда ишлашни бошлаган. Дуал таълим тизими орқали улар ўқиш билан бирга ишлаш, ойлик олиш ва кейинчалик барқарор иш ўрнига эга бўлиш имкониятига эга. Бугунги кунда Германияда 15 мингдан зиёд ўзбекистонлик истиқомат қилаётгани ҳам бу ҳамкорлик тобора кенгаяётганидан далолат беради.
