Қозоғистонда болалар учун ижтимоий тармоқлар тақиқланиши мумкин
Қонун лойиҳаларида фойдаланувчиларнинг ёшини аниқлаш учун махсус текширув механизмларини жорий этиш, шунингдек, талабларни бузган платформалар ва шахслар учун жавобгарлик чораларини белгилаш назарда тутилган.
Қозоғистонда 16 ёшгача бўлган болаларга ижтимоий тармоқлардан фойдаланишни чеклаш режалаштирилмоқда. Бу борада тегишли идоралар махсус қонун лойиҳаларини ишлаб чиққан бўлиб, ташаббус болаларни зарарли контентдан ҳимоя қилишга қаратилган. Бу ҳақда QRN news хабар бермоқда.
Маданият ва ахборот вазири, Бош вазир ўринбосари Аида Балаеванинг айтишича, вазирлик онлайн платформалар ва ОАВ фаолиятини тартибга солувчи ҳужжатлар пакетини тайёрлаган. Унга кўра, 16 ёшга тўлмаган фуқароларга ижтимоий тармоқларда аккаунт очиш расман тақиқланиши мумкин.
Қонун лойиҳаларида фойдаланувчиларнинг ёшини аниқлаш учун махсус текширув механизмларини жорий этиш, шунингдек, талабларни бузган платформалар ва шахслар учун жавобгарлик чораларини белгилаш назарда тутилган. Ҳозирда ҳужжатлар экспертлар муҳокамасидан ўтиб, жамоатчилик муҳокамасига тақдим этилган.
Расмийларга кўра, ушбу чора-тадбирлар болалар ва ўсмирларни экстремистик ғоялар, киберҳужумлар ҳамда интернетдаги зарарли контентдан ҳимоя қилишга хизмат қилади.
