Тошкент ва Фарғонада “закладка” ва контрабанда билан шуғулланган шахслар ушланди
Тезкор тадбирлар натижасида 3 кг га яқин наркотик модда мусодара қилинди.
Давлат хавфсизлик хизмати ҳамда Ички ишлар вазирлиги томонидан республика ҳудудларида гиёҳвандлик воситаларининг ноқонуний айланишига қарши қатор тезкор тадбирлар амалга оширилди. Бу ҳақда ДХХ Zamon.uzga хабар берди.
ДХХ Тошкент шаҳар бошқармаси ҳамда пойтахт ИИББ ходимлари ҳамкорлигида ўтказилган тезкор тадбир давомида Бектимер тумани ҳудудида «закладка» жойлаштиришни режалаштирган, Жиззах вилояти Зафаробод туманида доимий рўйхатда турувчи, 1992 йилда туғилган шахс ушланди.
Текширув жараёнида унинг ёнидан 6 грамм «гашиш» ва 5 грамм «мефедрон» гиёҳвандлик воситалари аниқланиб, белгиланган тартибда расмийлаштириб олинди.
Тезкор тадбирлар давом эттирилиб, ушбу шахс устачилик қилаётган Тошкент вилояти Тошкент туманидаги янги қурилаётган ҳовли уй кўздан кечирилганда, жами 1 кг 700 грамм «гашиш» ҳамда 500 грамм «мефедрон» моддаси ашё далил сифатида олинди.
Шунингдек, унинг Зафаробод туманидаги яшаш манзилидан яна 800 грамм «мефедрон» синтетик наркотик моддаси аниқланиб, мусодара қилинди.
Мазкур ҳолат юзасидан ушбу шахсга нисбатан Ўзбекистон Республикаси Жиноят кодексининг 25, 273-моддаси 5-қисми билан жиноят иши қўзғатилиб, унга нисбатан «қамоқ» эҳтиёт чораси қўлланилди. Ҳозирда унинг жиноий шерикларини аниқлаш бўйича тергов ҳаракатлари олиб борилмоқда.
Фарғона вилоятида ўтказилган тезкор тадбир давомида Қўштепа тумани томон ҳаракатланаётган «Spark» русумли автомобиль Тошлоқ тумани ҳудудида тўхтатилиб, кўздан кечирилди.
Натижада, транспорт воситасида йўловчи сифатида кетаётган, Қўштепа туманида яшовчи, 2007 йилда туғилган фуқарога тегишли болалар сумкасидан Қирғизистон Республикасидан олиб келинган 969 грамм «гашиш» гиёҳвандлик воситаси аниқланган.
Терговга қадар текширувлар давомида мазкур гиёҳвандлик моддасининг асл эгаси Фарғона шаҳрида яшовчи, 2006 йилда туғилган шахс экани аниқланиб, у ҳам қўлга олинган.
Ҳозирда ушбу шахсларга нисбатан Жиноят кодексининг 25, 273-моддаси 5-қисми билан жиноят иши қўзғатилиб, тергов ҳаракатлари олиб борилмоқда.
