Доналд Трамп “Тинчлик Кенгаши” низомини имзолади ва унинг раиси бўлди

 

АҚШ Президенти Доналд Трамп ўз ташаббуси билан ташкил этилган “Тинчлик Кенгаши” низомини имзолади ва ушбу тузилманинг раиси этиб белгиланди. Бу ҳақда РБК хабар берди.

 

Имзолаш маросими Швейцариянинг Давос шаҳрида бўлиб ўтди. Тадбирда Трамп кириш нутқида мазкур ташаббус глобал тинчликни таъминлаш йўлидаги муҳим қадам эканини таъкидлади.

 

“Биз бутун дунёда тинчликка эришамиз ва бу барчамиз учун тарихга қўшилган улкан ҳисса бўлади. Бу залда бўлган ҳар бир инсон — юлдуз, акс ҳолда сиз бу ерда бўлмас эдингиз”, — деди АҚШ президенти.

 

Доналд Трамп “Тинчлик Кенгаши” Бирлашган Миллатлар Ташкилоти билан ҳамкорликда фаолият юритишини, шунингдек, Ғазо секторидаги можаро якунланиш арафасида эканини, Украина можаросини ҳал этишда силжишлар борлигини ва Эрон музокараларга тайёр эканини қайд этди.

 

Оқ уй матбуот котиби Керолайн Левиттнинг маълум қилишича, низом имзоланиши билан “Тинчлик Кенгаши” расман халқаро ташкилот сифатида фаолият бошлади.

 

Давос Хартиясини жами 18 та давлат имзолади. Улар орасида Ўзбекистон, АҚШ, Қозоғистон, Туркия, Саудия Арабистони, БАА, Қатар, Покистон, Индонезия, Венгрия, Арманистон, Озарбайжон, Аргентина, Болгария, Иордания, Парагвай, Мўғулистон ҳамда Косово бор.

 

Маълумот ўрнида, кенгашга доимий аъзо бўлишни истаган давлатлар камида 1 миллиард АҚШ доллари миқдорида бадал тўлаши лозим. АҚШ маъмурияти ушбу маблағлар Ғазо секторини тиклашга йўналтирилишини билдирган.

 

Кенгаш низомига кўра, аъзо давлатлар етакчилари йилига бир марта АҚШ президенти раислигида йиғилади. Кенгаш раиси ҳар қандай қарорга вето қўйиш, шунингдек, аъзолик масалаларини мустақил ҳал этиш ваколатига эга.