Nestlé болалар озиқ-овқатлари 63 та давлатдан қайтариб олинмоқда
Чақалоқларда заҳарланиш ҳолатлари аниқлангач, компания глобал огоҳлантириш эълон қилди.
Nestlé компанияси болалар учун мўлжалланган айрим озиқ-овқат маҳсулотларини 63 та давлатдан қайтариб олиш жараёнини бошлади. Нидерландиянинг RTL телеканали хабар беришича, бунга чақалоқлар орасида заҳарланиш ҳолатлари аниқлангани сабаб бўлган. Компания барча тегишли мамлакатларга расмий огоҳлантириш юборган.
Шифокорларнинг маълум қилишича, заҳарланишнинг асосий белгилари кучли диарея ва қусиш билан намоён бўлмоқда. Мутахассислар бу ҳолатни Bacillus cereus бактерияси ишлаб чиқарган хавфли токсин билан боғламоқда. Ушбу бактерия чақалоқлар саломатлиги учун жиддий хавф туғдириши мумкин.
Аввалроқ Reuters агентлиги Франциянинг Lactalis компанияси ҳам ўз маҳсулотларини 18 та давлатдан қайтариб олаётгани ҳақида хабар берган эди. Бундан ташқари, бир неча кун олдин Россиянинг Rospotrebnadzor идораси Nestléнинг айрим болалар озиқ-овқат аралашмаларини мамлакатга импорт қилишни вақтинча тўхтатган.
Маълум қилинишича, NAN 1 OPTIPRO, NAN 2 OPTIPRO, NAN Supreme, NAN EXPERTPRO, NAN лактозасиз, PreNAN, Nestogen Comfort Plus ва Alfare Amino каби қуруқ аралашмаларда хавфли сереулид токсини аниқланган. Ушбу маҳсулотлар ўтган йилнинг 15 апрелидан 27 ноябрига қадар ишлаб чиқарилган бўлиб, токсин ташқи етказиб берувчидан олинган ўсимлик мойи хомашёсида топилган. Мутахассислар мазкур токсин қусиш ва диареяга олиб келиши мумкинлигини таъкидламоқда.
